當年今日
關於我們

【限聚場】林日曦半厭世宣佈7月開騷:冇得驚國安法

蘋果日報 2020/06/22 15:00

林日曦Talk Show國安法半厭世

由去年抗暴之戰至現在武漢肺炎,香港已取消逾600場演唱會,舞台劇、talk show 都全部叫停,演出業經歷近一年陷入寒冬的日子後,終於逐漸復蘇,繼梁漢文宣佈10月開紅館騷、張敬軒11月開紅館騷後,毛記腦細林日曦昨晚在社交網公佈將於7月2起,假九展Star Hall舉行10場「林日曦細聲講:半厭世」talk show,成為限聚令下首個重開的演出,場館只能坐一半人。
林日曦寫道:「世界有病,香港就香,時代康復前,極速見一面?不是棟篤笑,沒有是但噏,林日曦全新talk show『林日曦細聲講:半厭世』,厭倦不正常世界,記低壞時代百態。」由賣飛至開騷只有短短一星期,他形容這為「人類史上最極速開show」,而由於限聚令關係,場館只能開賣一半數量座位「半空半滿限聚場」。
將於11月在Star Hall舉行talk show的杜汶澤留言:「我可唔可以用四張『杜汶澤Stand Up Hong Kong』 嘅貴飛同你換兩張山頂位呀?」有網民留言:「一定睇,而家唔睇,將來都唔知仲有無得睇。」的確,「港版國安法」殺到埋身,勇於發聲的林日曦在7.1後開騷,如果法例通過,驚唔驚隨時觸犯國安法拉人封騷?林日曦接受《蘋果》電話訪問表示:「你話國安法通過,騷內容驚唔驚?我覺得就係冇得驚,國安法係乜?你唔知我唔知,模模糊糊等大家驚,你要驚就好多嘢要驚,所以只能夠話冇得驚,我自己寫咗嘅嘢都係繼續咁講。」
林日曦表示上星期才確定場地,「因為一路以嚟都有限聚令,都係最近呢次先放寬,仲要唔係好似食肆咁,表演場地只放寬50%,只可以入一半人,可能等多半個月會全面放寬,但我唔想等,其實都等咗幾個月,而家睇落好似好突發,兩日後賣飛,一個禮拜即刻開騷,但其實我幾個月前,啱啱有武漢肺炎已經匿喺屋企構思呢個騷,與其話想帶啲歡樂畀香港人,我覺得自己冇咁偉大,我想帶啲歡樂畀自己多啲。」
他以屋企借喻香港,家不成家,令他有半厭世感覺,「呢幾個月大家屈住喺屋企咁耐,但個屋企未必真係自己屋企,可能係香港呢個屋企,因為武漢肺炎疫症關係,大家去唔到第二度,香港本身都有好多事情進行緊,唔同人有唔同感受上差別,有啲人唔開心,有啲人反而積極咗,情緒係好混雜,自己情緒都好複雜,其中有隻係有時都好厭世,香港好污糟,啲人好污糟,有時自己都好污糟,污糟包括有啲人做出嚟嘅行為好污糟,所以呢個騷叫半厭世,乜叫半厭世?一半係厭世,一半係呢個世界好不堪,但可能搵到方法生存,有啲心態去面對,呢個騷就係圍繞呢樣嘢去分享番自己嘅故事。」
至於場館只能坐一半人,場租有冇優惠呢?林日曦說:「場租收一半?梗唔係,佢都有難處,佢都有畀少少優惠,佢都幾個月冇工開,冇得強求,確係比正常時間開騷少咗好多收入,但冇辦法,我想做呢件事,唔諗呢樣嘢,同埋點解呢段時間開,可能下一個限聚令已經解除晒,但正正就係咁,我覺得幾特別,好似戲院入得一半人,大家隔開咗坐,都係幾特別回憶。」

限聚令下,已宣佈舉行的演出包括:
「林日曦細聲講:半厭世」talk show
演出日期:2020年7月2至9日(星期六及日開日夜場)
門票價錢:$480 / HK$580 / HK$680
演出場地:九龍灣國際展貿中心 Star Hall
「梁漢文 紅館演唱會 2020」
演出日期:10月尾
門票價錢:待定
演出場地:紅館
「杜汶澤Stand Up Hong Kong」talk show
演出日期:2020年11月5日 - 9日 (共6場)
門票價錢:$680 / $580 / $480
演出場地:九龍灣國際展貿中心匯星 Star Hall
「張敬軒 X 香港中樂團盛樂演唱會」
演出日期:2020年11月22-25日
門票價錢:$980 / $680 / $480
演出場地:紅館
-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新
empty
受訪者提供圖片
empty
林日曦7月於限聚令下開talk show。(網上圖片)
empty
林日曦認為世界病了,香港就香!(受訪者提供圖片)