澳洲名模MirandaKerr噚日去咗日本,晚上就出席咗佢代言嘅手袋品牌聖誕節活動,一身紅色打扮嘅Miranda十分搶鏡,佢仲好似有個小型手袋騷咁,攞住六款不同手袋喺台上展示,當中仲話有佢自己設計嘅款式㖭。
大會請嚟日本組合E-Girls兩名成員唱出廣告歌,而活動仲招待咗一班Miranda粉絲入場見佢,啲粉絲見到Miranda就攞住手機狂影,而其中仲有啲幸運粉絲,仲抽中可以同佢合照,有個女粉絲就攞住自拍神棍同Miranda影相,點知Miranda原來從來未見過自拍神棍,佢竟然覺得好新奇咁話:「支棍咁得意嘅,第一次見咋!」粉絲都好驚訝佢竟然未見過自拍神棍。