繼舊年ViuTV 4月開台之後，另一個全新免費電視奇妙電視將會喺聽晚8點正式開台，採用數碼77頻道播放。

奇妙電視係有線寬頻旗下，而有線寬頻早前建議供股，變相畀永升亞洲注資入主有線，但交易重等今個月29號嘅特別股東大會表決通過。日前有線寬頻母公司九倉主席吳天海出席股東會時表示，如果永升注資方案獲股東通過，有線將一切如常，但如果議案若被否決嘅話，唔單止有線電視冇能力接受為期12年嘅新收費電視牌照，就連奇妙電視在內亦難以營運。估計因為呢個注資方案關係，奇妙電視聽日開台，有關方面都冇搞任何慶祝開台活動，只係喺聽晚8點播出早排錄影好嘅半小時特備節目《星匯奇妙77》作為開台慶祝。

講番奇妙電視台嘅節目，佢哋主打合家歡綜藝節目，所以專登揀咗母親節呢日開台，為咗令香港觀眾有親切感，奇妙搵咗一大班曾經為大台効力嘅藝人主持節目，包括「真‧香港人」河國榮、盧海鵬、邵仲衡、何傲芝、何傲兒、廖碧兒、陳倩揚、歐倩怡同林芊妤(Coffee)等等，仲有請咗前無綫新聞主播方健儀同李司棋等分別帶埋媽咪及囡囡一齊去旅行參與《帶阿媽去旅行》添！

河國榮會幫奇妙主持《香港有寶證》搵香港奇寶、邵仲衡就主持《香港事‧香港是...》尋找香港特色行業，而何傲之同何傲兒就會主持《喜出望外》中嘅環節《何家姐妹何家餐》，跟唔同文化背景嘅香港名人藝人開餐食家鄉菜，了解唔同人飲食文化。日前《蘋果》就搵咗佢哋4位出席「奇妙飯局」，預祝奇妙開台成功。

講到佢哋4位都係無綫出身，問佢哋點解有大台唔做而撐一個新電視台時，大佬孝邵仲衡就笑住話:「我唔係大台唔拍，係佢哋冇搵我，曾展章(有線電視娛樂有限公司執行董事)話幫下手出下鏡，我話好呀。另一樣我好中意傳統啲handicraft、三行或者工藝，佢開個節目比我講呢啲，換啲老師傅特別行業好似講紙紥，龍頭獅頭、古琴，我一路覺得好奇妙囉。」

何傲兒就話:「我劇拍過飲食節目又拍過，同家姊拍飲食節目係第一次，可以透過呢個節目等觀眾了解吓自己，一啲比較真實嘅格。」咁兩姊妹第一次合作有冇嘈交？何傲兒笑住話:「有呀，我成日睇佢唔順眼好耐架啦！」至於何傲之就話:「我係由ATV、TVB、now到奇妙，每一個都係學習機會，最吸引係我同妹妹之間，我覺得會畢生難忘囉，呢個係我哋將來大個咗講番有個咁嘅節目。」

河國榮覺得時代變咗，佢哋唔使再簽死比一間電視台做嘢:「邊度有好嘅節目拍咪去嗰度囉，可能同一時間拍緊間電視台。」就正如佢同邵仲衡，佢哋幫奇妙又幫ViuTV又幫香港電視拍嘢，同時間食三家禮。邵仲衡話:「電視台都係請出邊製作單位去做，所有方式都唔同咗，有好多新嘢同唔同方法，同所有傳統台格唔同，以前大台好似曼聯，有好多叻人出現，炮製咗好多新人好似七小福，又碧咸又史高斯，慢慢就好多問題，有啲老咗有啲離開，有段時間可能低潮呀，但仍然係一個台嚟。」

今時今日「電視撈飯」嘅觀眾愈嚟愈少，佢哋幾個亦認同現時科技進步，人人一部手機，一家幾口各自攞手機睇自己喜歡嘅節目，屋企wifi收得好唔好，似乎重緊要過電視播乜嘢節目，所以一個新電視台要吸納家庭觀眾實在有一定困難。不過，邵仲衡就話奇妙電視做嘅節目好本土，好適合香港人去睇，而河國榮就話:「冇人知將來多唔多人睇新開電視，惟有盡拍到最好啲，希望多啲人睇。我哋拍緊廣東話嘅節目，網上好多唔係唔廣東話節目，所以多唔多人睇，就要睇吓香港人支唔支持，會唔會睇番廣東話覺得好舒服！收視同口碑，我寧願要口碑。」

何傲芝同何傲兒認為新電視台比觀眾多一個選擇，傲兒話:「選擇多咗，觀眾又要求高啲，有競爭先可以做到更加好嘅嘢。」傲芝亦認同話:「我覺得最緊要有得揀，買棵菜都會格價架麻，用好嘅價錢去揀棵靚嘅菜，正如我哋都會用時間選擇睇一個好嘅節目。作為觀眾有得揀就好緊要，正如演員有得揀自己想做嘅節目一樣。」

除咗何傲芝之外，河國榮、邵仲衡同何傲兒都曾經喺大台挨過、辛苦過，過程雖然辛苦，但佢哋三個都覺得享受同學到嘢，何傲兒話:「試過無得瞓，但呢啲唔係乜嘢大事，我出到嚟簽其他公司先至知，當日磨練令我出到去都可以handle好多事，當日公司可能搵唔到錢，但佢真係比機會你學嘢，錢真係喺出邊搵囉。」

攝影:沈健程
場地:圓山台灣料理