【筲箕灣】無綫28歲新一代男神余德丞上月8日晚在西環踢波期間，突然暈倒昏迷，被送往瑪麗醫院深切治療部，一度情況危殆。余德丞甦醒脫離危險期後，病情轉好轉到心臟科病房，其間他亦有在網上留言報平安，留醫一個月，終在上周五出院返家休養。

送朋友回家

昨日《蘋果》讀者爆料指余德丞精神奕奕在筲箕灣東大街的安利食切腩撈粗。《蘋果》記者接報到場，見出院後一直沒有公開露面的余德丞，身穿黑tee和短褲，戴住cap帽，精神不俗並且好生猛，只是身形明顯消瘦，比起出事前擁有一身健壯肌肉的他，細了成個碼。
余德丞跟男友人吃畢埋單後，一起去停車場攞車準備離開，余德丞還做「柴可夫」，先在銅鑼灣放低朋友，跟住自己駕車返回大坑寓所休息。之後余德丞在Ig的限時動態分享在安利吃了甚麼，他點了店中的招牌切腩撈粗及油菜，並貼上單據，店員寫上「get well soon」祝福男神。

上周五出院

上周五，余德丞在Instagram報喜出院，當時表示好感恩以及多謝醫護人員照顧，並表示會愛惜生命：「我都希望今次之後，我嘅身體會生生性性，爭一口氣，唔好再令大家擔心。醫生話短期之內唔可以做運動住，相信都會係我最唔習慣嘅。生命無 take 2，今次咁好彩有多一次機會，我一定會好好珍惜。畀啲時間，等我休養多一陣，好快我就會重新出發。」
採訪、攝影：黃曉程