近年唱作歌手賣少見少，5年前Aga由空姐轉做唱作歌手，揀咗一條艱辛嘅路：「第一日認識監製舒文，佢問我想做歌手定唱作歌手？佢話做唱作起碼要5年，佢用咗3個鐘同我講，音樂係搵唔到錢！」

爸爸係西班牙籍樂手，Aga話9歲開始喺收音機聽歌：「好細個知道自己鍾意音樂，所以大個咗目標就好明確，諗住做空姐儲錢去外國讀音樂，每去到一個地方，可能好多空姐去玩去食嘢，自己就留喺酒店房食杯麵，嗰兩年食咗好多杯麵，學用music software做歌又學琴，之後識咗我嘅監製舒文。」

那時舒文教佢寫廣東歌，Aga一路飛一路寫歌：「日日瞓兩三個鐘，記得有次好辛苦，因為好多日唔夠瞓，但又要飛，點知架機delay，飛咗10幾個鐘頭，返嚟要去交demo，咁我就直踩通宵，我就喺度諗，如果用音樂做到職業幾好呢，之後就勇敢地辭職去做音樂。」然而，想像永遠是好的，現實卻是殘酷的，Aga說：「但嗰年我完全賣唔到歌，跟住好多人有好多說話，親戚朋友會話：『你咁樣，其實好多女仔想做空姐，呢份職業幾好呀！』講到你有少少不務正業。」

當時連爸爸都擔心佢，Aga坦言：「因為佢做音樂，知道條路好艱難，佢話：『不如考返空姐啦，唔緊要㗎阿囡！』有一日我返屋企，見到有張空姐嘅form擺喺枱面，我知道佢哋擔心，嗰年係過得最辛苦，冇咗一份正職，做嘅嘢未畀人賞識，唔知條路點行！」但Aga冇放棄，仍然堅持自己嘅理想：「因為我覺得每寫一首歌都係一個機會，我keep住提自己，香港唔係一個好大嘅城市，點都唔會懷才不遇，默默耕耘嘅話，一定有屬於自己嘅位置。」

點解要揀做唱作歌手？Aga說：「因為真係鍾意音樂，某程度上覺得音樂救咗我，我細個好靜，開心唔開心都彈琴，音樂對我嚟講係一個出口，我覺得呢個世界唔可以冇咗音樂，所以第一日識舒文，無論佢點樣打擊我，我都話：『我知㗎啦，你畀我做啦，我唔做歌手，我要做唱作歌手！』」

攝影：陳俊強
攝錄：仇志德
場地：Harlan's (The ONE)

精選娛聞，喺晒《娛果》
http://fb.com/appledailyent