一連兩場《薛家燕愛你無限60年演唱會》噚晚喺紅館完滿結束，徐小鳳、潘迪華、劉松仁、羅霖、鄭丹瑞及邵音音等捧場。劇中同家燕姐飾演母子嘅張智霖(Chilam)，以初哥哥造型吹住哨子出場合唱《分分鐘需要你》，家燕姐話前年籌備演唱會嘅時候，Chilam已經主動要求做嘉賓，家燕姐仲爆Chilam為人闊佬：「有次去大馬登台，佢請我食一條六千幾蚊嘅魚，條魚仲滑過我啲肉，條魚叫『忘不了』。」Chilam話以行動代表說話，即場同家燕姐嚟個深情擁抱，一切盡在不言中，搞到家燕姐話畀佢攬到暈陀陀。

之後家燕姐以勁歌熱舞向已故好友張國榮、陳百強及羅文致敬，佢又感激小鳳姐畀咗唔少紅館開騷心得：「佢問我係咪會跳舞？佢話自己唔跳舞，因為好索氣。」家燕姐又完成心願與譚詠麟合唱《愛人女神》，譚校長笑笑口話可以喺畀佢嗌得做前輩，o依家仲屹立喺舞台上嘅人，真係寥寥可數，所以嗌家燕姐嗌得好順，佢仲話：「家燕姐出道耐過我，已經一個甲子，我由60年代黑白電視已經追睇你嘅作品，我係你嘅粉絲。」

跟住譚校長突然喺褲袋拎咗粒墨黐喺額頭，仲話：「呢粒墨如有神助，並唔係等閒之輩，今時今日仲可以有laser放射出嚟。我粒墨就黐上去，你粒墨應該有根。」校長仲話家燕姐係傾慕嘅偶像。演唱會尾聲，草蜢同家燕姐合唱《忘情森巴舞》，蔡一智話同家燕姐好似一家人，因為細佬蔡一傑嘅額頭都有粒墨，蘇志威讚家燕姐身材同後生嗰陣一樣咁好，最後佢哋教全場觀眾跳十字舞。

慶功宴上，家燕姐心情仍然興奮，最初嗰陣好大壓力，又要記歌詞、又要排舞，擔心冇魄力應付，好彩經過兩個月嘅苦練，終於做到最好。家燕姐仲話：「呢個演唱會係令我畢生難忘，睇到三個子女上台唱歌，真係忍唔住喊。」家燕姐仲自爆男友連續兩晚都有捧場，仲坐咗喺第一排握手，唔知男友又有冇入後台呢？家燕姐話：「冇呀，因為我好忙，冇辦法照顧佢，但係我仲未有時間介紹畀七公主認識，或者遲啲安排食飯。」再問確實日子，佢就話：「唔好咁快，2020年先，我仲以為你哋講結婚。等我搞埋選婿大會，搞掂珊珊先。」

講到男友有冇話最鍾意邊part，家燕姐話：「佢鍾意仔女上台嗰部份，喺台下都感動到喊，佢驚我太辛苦，我哋會一家到日本玩幾日放假！」再追問結婚嘅事，家燕姐就話：「坦白講都唔會結婚喇！我咁嘅年紀仲結乜嘢婚呀？做吓朋友都開心，我咁忙又要成日飛嚟飛去，唔好令人唔安樂，要對人有交代，拍拖傾吓心事，芳芳話有景轟，但唔係滾。」至於同男友係咪純純的愛，家燕姐點頭答：「係。不過我好感激每個嘉賓都花盡心思演出，令我感受到厚厚嘅愛。」

精選娛聞，喺晒《娛果》
http://fb.com/appledailyent