復活節假開始，三部荷李活電影包括系列電影《狂野時速8》（Fast & Furious 8）、《波士BB》（The Boss Baby）同《藍精靈：迷失的村莊》（Smurfs：The Lost Village）昨日（周四）齊齊在港上映。

《Fast＆ Furious》狂野時速系列男主角保羅獲加（Paul Walker），上集拍攝期間遇車禍喪生，遺作《狂野時速7》前年在港開畫單日票房收447萬票房，而《狂8》在毫無懸念下，噚日開畫就以527萬元成為開畫同單日票房冠軍，仲暫時成為今年開畫日票房冠軍，破咗周星馳《西遊伏妖篇》509萬元嘅紀錄。

至於噚日單日票房第二位嘅係動畫《波士》嘅274萬元，最厲害嘅係連同之前嘅優先場，累計去到853萬元，相信今日票房會過1,000萬元。

港產片都唔失禮，喺大片當前之下，由金像獎贏得新晉導演黃進執導嘅《一念無明》後勁依然凌厲，上咗畫兩個星期，噚日繼續以61萬元保住單日票房第三位，拋離第四位、新上畫《藍精靈》嘅44萬元票房。

由出爐影后惠英紅主演嘅電影《幸運是我》，噚日再度公映，只上一日、合共放映3場，但票房都有2.7萬元，平均每場有100人入場，入場人數贏埋《狂8》嘅99.5平均入場人數，可能同《幸》片有包場謝票有關。

另林家棟封帝之作《樹大招風》亦載譽重映，由即日起至本月17日分別於又一城及MCL新都城戲院上映，今明兩日已經full house，16同17號兩日尚餘少量門票。