高級視聽展今日起一連三日喺數碼港舉行，主題係近期熱爆嘅高清3D電視及靚聲到暈嘅數碼音響，場內唔單止展示最新最高檔產品，又靚聲歌手夏韶聲、羅敏莊即場唱歌助興。
負責展覽統籌嘅亞洲高清協會會長李柏權（Alan）話，今次重頭展品係啱啱到港嘅家用投影機WolfCinemaDCX-1000FD，售價80幾萬蚊，以及發燒級MusicLibrary音樂儲存系統Olive4HD，屆時全港公開首播「高清」聲音任白戲寶帝女花。講到咁巴閉，小妹即刻飛身試機。

新投影機似喺戲院睇高清

去到位於中環示範室，見到嗰部Wolf體積超巨型，長42吋，闊30吋，高12吋。Alan話，呢部DLP投影機採用同戲院一樣Xenon燈膽，畫面色彩貼近戲院，但質素更好，「戲院投影機對比度係2000：1，Wolf高到50000：1，畫面黑位更黑，立體感更強；投到400吋畫面，拍得住小型戲院。展覽會即場試播仲未出街嘅陳奕迅2010演唱會片段」。Alan話，部機已經有發燒友買咗，仲一擲400幾萬打造一個800呎私人影院。小妹買唔起，但第一個試睇都好爽。
Alan又話，另一部焦點機Olive4HD賣點係一體式設計，唔使駁電腦就用得，又備有繁、簡體中文介面，儲到6,000隻冇失真格式嘅CD，又可接駁iPhone操控。小妹即場試聽「高清」帝女花，靚聲到痹。詳請可瀏覽 http://avshow.cyberport.hk/。

電郵：mailto:[email protected]