當年今日
關於我們

體壇拾趣:
居里神奇捕「鵝」出線在望

蘋果日報 2015/04/25 00:00


勇士周四作客塘鵝全場大落後,終靠控衞史堤芬居里(Stephen Curry)臨完場前射入神奇三分波追平,加時再反勝123:119。勇士喺呢個NBA季後賽首圈,場數領先到3:0,贏多場就晉級。
塘鵝今仗大部份時間領先,但大前鋒安東尼戴維斯(Anthony Davis)喺第四節最後9.6秒射失罰球,「造就」居里幫勇士射入追平三分波。呢球嘅神奇之處,係居里喺兩個塘鵝球員一齊撲埋去犯規、自己失晒重心都可以射入;如果球證有吹犯規畀佢入埋and 1,就連加時都唔使打㖭。
empty
公鹿一樣臨尾香
第四節開波仲落後20分,但勇士追吓追吓仲贏埋,交出40分嘅居里竟然話一路都冇驚過:「大家都好自信,有足夠精力可以成功後上。」但都補番句:「有得揀嘅話,我唔想再喺季後賽先落後囉。」有得揀嘅話,所有喺屋企睇直播嘅球迷應該都想去現場睇,因為電視直播喺最後四秒突然冇訊號,好在冇出現超級絕殺咋。
AD話呢場係自己遇過最難受嘅敗仗,而公鹿球員應該可以講句:「I know that feel bro」。佢哋主場對公牛,臨尾領先一分但都守唔住,俾對手追平後打兩次加時再輸波。加埋塞爾特人,公鹿同塘鵝三隊周四主場輸波,都落後場數0:3,而歷來都未試過有球隊喺落後0:3下晉到級。
empty
戴歷路斯(右)今仗打成48分鐘,射入最高34分,幫公牛贏波。路透社