蔡少芬（Ada)、林盛斌(Bob)、林欣彤、蔣志光、韋綺姍、張文慈、泰臣等今日到主題公園為《老表畢業喇！》宣傳，郭晉安因病缺席。今日42歲生日嘅泰臣，獲張文慈送上香吻，非常好艷福。

Ada自爆剛升讀小一嘅6歲大女張楚兒招惹「狂蜂浪蝶」，佢笑住口話：「呢一代啲小朋友咁快嘅，我都係三年班先至識。有個同學仔好鍾意我大女，成日攬住話要錫嘴，又話要同佢結婚。如果有男仔走嚟話要錫你，我教佢『hotcha』踢開佢，除咗爸爸、媽媽同妹妹之外，其他人都唔可以。個女就話佢淨係錫頸同膊頭，我話都唔得，要識保護自己.....如果真係要怪佢，就怪個女好似我咁靚，係危險啲。」Ada透露老公張晉仲緊張，好認真咁喺視像同囡囡講﹕「一定要say no，不過我諗都係小朋友玩啫！」

對於有網民指Ada在劇中把聲好沙，Ada直言自從拍《珠光寶氣》嗌破喉嚨之後，每當唔夠瞓就會聲沙。佢話﹕「當時去醫院割咗個喉嚨血泡，但因為劇集要埋尾，做完手術休息唔夠。所以現在一唔夠覺瞓，把聲就沙沙地。」