佔中令警民關係撕裂，監警會作為監察警方嘅重要法定機構，公眾對佢嘅期望同要求自然高，尤其係監警會如何監察警方處理佔中投訴個案。
噚日監警會同投訴警察課舉行每三個月嘅聯合會議，八項議程中，包括兩項涉佔中投訴調查進度，點知會議上每當警方代表匯報接獲嘅佔中投訴數字或其他議程資料後，幾乎無監警會委員提出詢問，全場只有三名委員發問，結果會議用咗唔夠半個鐘就結束，比起以往最少要一個鐘以上大縮水。早排監警會委員換咗班，出現多名新面孔，八方希望呢批新委員盡快適應監警會工作，包括會上向警方發問，以免被誤會hea做啦。