成立只係短短兩年嘅新民黨，有個行會成員做主席，難怪噚日兩歲生日party都有咁多高官畀面。逢親呢啲宴會，食物及衞生局前局長周一嶽總會獻唱，令來賓「忘不了你」，八方發現佢有接班人嘞，事關田二少噚日連唱四首歌都甩beat兼走音。

政壇技安學唱歌

田二少第一首歌同周一嶽合唱《Devoted to you》，在場人士話嶽哥簡直超晒班；其後二少同保安局副局長李家超同入境處一哥陳國基合唱《海闊天空》，好多人聽到皺眉；之後同立法會議員廖長江唱《認錯》，更加引證佢「政壇技安」嘅地位。唱得最好嗰首係溫拿嘅《朋友》，事關佢同其他四位男士一齊唱，唔太聽到佢把聲。
「嶽曲」好聽，唔係冇原因㗎，周一嶽𠵱家每星期學唱歌一次，認真發展歌唱事業嘅佢，歡迎團體慈善騷搵佢戥腳。盛傳曾經喺馬會會所泳池、㩒劉鳴煒個頭落水而被禁足馬會一年嘅神童鄺其志，噚日以新民黨顧問身份亮相，搬出三「不」回應事件：不爭執、不碰撞、不打架，暗示冇郁手咁話，仲笑笑口話仲有游水㗎，但就唔講係咪去馬會游囉。