【李八方online】90後宅男 變身CG特效專家
李八方《拆彈專家》徐德彪
《拆彈專家》嘅一幕CG特效爆破場面,90後宅男徐德彪有份炮製。蔡朗清攝
睇過港產片《拆彈專家》嘅觀眾,一定對最後一幕紅磡隧道遭500噸炸藥炸散嘅場面記憶猶新,原來大爆炸嘅幕後黑手,係—個被父母認定只識打機、不務正業嘅90後宅男徐德彪。佢日前特別帶父母-齊觀賞《拆彈專家》,父母見到震攝場面,開始明白佢宅得有道理,佢亦好想同宅男講:「同我—樣讀書唔叻嘅人唔使氣餒,只要搵到自己興趣,朝住目標進發,—定可以成功。」
現職Free D Workshop特效指導嘅徐德彪最記得細個睇過《侏羅紀公園》,「嗰陣以為啲恐龍係真咪?啲暴龍栩栩如生,仲有啲水珠滴喺暴龍身上,點會係假?」,大個先知恐龍係CG特效,CG種子喺心靈萌芽,成為他人眼中嘅宅男,「嗰陣返到屋企就匿埋房打機,讀書好差。」
中五面對人生交叉點,讀書唔叻就諗下自己有乜長處、興趣,「就係CG」,結果報讀咗IVE遊戲動畫製作課程。揀啱路令宅男畢業後好忙,2010年起參加多齣電影後期製作,計有《逆戰》、《風暴》、《赤道》,去年仲升呢Supervisor,首次帶隊-手-脚為《拆彈專家》做後期CG製作,炮製本港電影史上最大型嘅紅隧爆炸CG場面,「香港人優勝處識得變通,轉數咁快,今次用咗最新autodesk 3d max,配合唔同軟件,造製1200個CG場面。」