伍允龍早排畀拍拖8年嘅鍾嘉欣狠飛，「復牌」後不愁寂寞，近排有傳佢搭上新劇《城寨英雄》嘅拍檔劉佩玥。今日就有讀者程小姐透過「爆相爆片」，指伍允龍今日年初三下晝，孖實貌似劉佩玥嘅妙齡女仔，喺尖沙嘴食英式菜嘅Bricklane撐枱腳。

據程小姐透露，二人由下晝兩點坐到三點幾都未走。伍允龍點咗一份英式早餐，而坐喺對面、疑似劉佩玥嘅女仔就點咗一客意粉。開餐期間，二人邊講邊笑，伍允龍仲不時將切好嘅煙肉放喺女伴嘅碟上，細心又體貼。程小姐就話：「個女仔雖然背住我哋張枱，但見到佢塊面圓圓哋，有少少化妝，身形樣貌都好似劉佩玥！」