【Beyond同好會】電台追星等至半夜 歌迷：家駒畀錢我哋搭的士走

蘋果日報 2018/06/30 00:00

秘密警察逝世25周年阿拉伯跳舞女郎黃家強Beyond葉世榮黃家駒黃貫中
    Beyond嘅忠實歌迷Angela及曾任職傳媒嘅V記同Mavis，就細數當時同家駒相處嘅點滴，佢哋異口同聲話早喺《阿拉伯跳舞女郎》時期已經喜歡上Beyond，其中V記同Angela話：「我哋係同學，學校入面有一個學姐係Beyond歌迷會，所以我哋成日都有機會去睇《勁歌金曲》。」
    後來喺Beyond嘅活動中識到Mavis至今，佢哋自覺屬冷靜型歌迷，最多都係等為見家駒一面等到半夜三更，V記話：「試過我哋3個喺商台等到好夜，最後家駒出嚟，見到我哋咁夜仲唔走，問我哋點返去，我哋話唔知，或者行返屋企，家駒就話：『行乜鬼呀？』最後畀錢我哋搭的士走。」
    佢哋記得家駒好鍾意用教誨嘅方或同歌迷傾偈，Angela記得當時只有17歲，家駒已經教佢出嚟做嘢，咩都要試，唔好怕蝕底怕辛苦。
    當時Mavis已經入行做記者，當家駒知道後，竟然同佢講：「『你唔好做記者啦，好奸險㗎，你留番長啲頭髮選港姐啦！』我好後悔當時冇聽佢講。」仲話家駒好鍾意同歌迷講人生道理，有時會考臨近，佢會叫大家考完試先好出嚟。
    V記更稱家駒改變了她一生：「我係因為想見家駒，所以入行做記者，如果唔係佢，我o依家可能做緊其他工作，過緊第二種人生。」同樣地，Mavis同Angela都話喺人生路遇到任何挫折困難，都會搵番Beyond嘅歌嚟聽，因為總有一首可以配合到。
    當年家駒出事，Mavis已經喺報館任職記者，她憶述家駒出事後，總編即刻叫佢寫家駒生平：「我第一個反應係，吓？佢未死喎，我唔寫㗎，唔好咒佢。」
    家駒遺體被送返港，Mavis被派往採訪，她說當時心情好複雜、好矛盾：「我係親眼喺現場睇到副棺木推出嚟，嗰一刻真係忍唔住。」
    Angela認為Beyond嘅精神喺家駒離世後出現斷層：「係浪費咗，我覺得如果家駒仲喺度，依然會繼續宣揚Beyond積極、樂觀及正能量精神。」Mavis就深信家駒會有安排：「人生係自己選擇嘅，佢哋（Beyond三子）選擇咗自己選擇嘅路，大家都冇得逼，但我信總有一日會再睇到Beyond嘅巡迴演唱會。」
    採訪：曹家誠
    攝影：仇志德、馮嘉銘
    精選娛聞，喺晒《娛果》
    http://fb.com/appledailyent
    empty
    （攝影：仇志德、馮嘉銘）
    empty
    （左起）V記、Mavis及Angela因Beyond而成為好友。
    empty
    受訪當日佢哋大晒珍藏（讀者提供圖片）
    empty
    當年追星，買明星相係指定動作。（讀者提供圖片）
    empty
    無論單人定組合照，幾乎都唔會放過。（讀者提供圖片）
    empty
    Mavis等人儲咗好多Beyond舊相（讀者提供圖片）
    empty
    《舊日足跡》係Beyond早期專輯，封面照仍係5位成員。
    empty
    《秘密警察》時期嘅Beyond，眨吓眼已經係30年前嘅事。
    empty
    《真的愛妳》係Beyond嘅經典作之一，至今仍是母親節熱門點唱歌。
    empty
    其實Beyond除咗唱歌，其實都拍過幾套戲，其中一套就係《莫欺少年窮》。
    empty
    Mavis話為咗Beyond先入行做記者，但家駒反而叫佢選美。
    empty
    小時候嘅Mavis與家強合照留念，後面就係家駒。（讀者提供圖片）
    empty
    憶起當日家駒出事後遺體運返香港，有份「接機」嘅Mavis，話當見到棺木推出嚟嗰一刻，真係忍唔住。
    empty
    Angela記得當時17歲嘅佢就已經俾家駒教佢出嚟做嘢，咩都要試，唔好怕蝕底怕辛苦。
    empty
    佢哋覺得Beyond雖然出現斷層，但覺得係其餘3子各有選擇，更深信有一日會再睇到Beyond嘅巡迴演唱會。