經紀黃月中曾推介創維數碼(751),話佢業績正到你唔信,故此可以吸納。
雖然佢所言非虛,創維公布業績真係好靚仔,但股價似乎在1元水平有好大壓力,成日都衝唔到上去。不過,經紀黃就表示信心十足,重叫小初淡定啲,再睇耐少少。
創維上周二公布全年業績,盈利有成2.136億元咁多,比起去年勁升2.4倍,末期息派每股4.5仙。
雖然係咁,但創維股價在1元有阻力,好似上星期五咁,最高見過0.99元,但收市時回落至0.95元,升幅收窄至1%。
經紀黃話,查實有唔少芬佬仍然睇好創維,其中惠理基金一直都有收集創維,由0.60元買到0.70元樓上,家陣持有8%咁多。以金手指往績,佢哋沾手嘅股份,隻隻都炒到飛起,所以創維都唔應該例外。
除咗金手指外,亦有歐資行一直睇好創維,上星期五重出咗報告,話公司前景好秀麗。雖然早前大陸彩電市場競爭劇烈,但家陣剩番嘅生產商唔多,所以彩電價格應該穩定下來。
慕容小初