網絡世界真假難辨，明星名人均可能中招。天主教香港教區今個月初發現，有人自稱係主教「代言人」，幫主教陳日君樞機同助理主教湯漢寫Blog，由於呢個「疑似」主教Blog內容又似層層，令唔少教友信以為真，教區以正視聽，好似海關掃假貨咁，喺最新一期《公教報》刊登聲明，指陳日君從冇寫Blog，亦從未授權個別人士代表佢參與網上討論，「對這類盜用肖像及假冒身份的罪行，深感厭惡。」呼籲教友小心，唔好俾人坤。

八方明查暗訪，知道其中一個假冒網誌題為「陳日君，若瑟主教爺爺的生活點滴」，博客簡介話：「因為我（指陳日君）不太懂用電腦，所以，他是我的代言人，當我學懂的時候，我便會親自管理。」好彩八方一早知係假嘢，否則隨時中招。
呢個Blog負責人姓毛，24歲，喺網誌內刊登多張同陳日君及湯漢嘅合照，呢位毛生個名唔知係咪叫做「中生有」，竟然自稱「領銜輔祭總指揮兼online主教助理」，暱稱陳日君及湯漢為「大哥」和「二哥」，果真膽生毛！
阿毛更以陳樞機名義撰文批評淫照事件，「我很痛心，我每天都為受害者及他的親友祈禱，求主賜給醫治他們的心靈，好使他們早日恢復情緒，投入工作。」早前湯漢升任助理主教，阿毛又出手，「湯主教終於成為我的接班人，很高興呀，感謝天主呀！」

教友唔係好儍好天真嘅人，點解會中招呢？可能係因為個Blog內容好堅，連陳樞機早排腳痛睇醫生都爆埋出嚟，有網友對樞機腳患甚為憂心，留言慰問，阿毛竟然扮陳日君回應，「乖，有心了。」阿毛仲玩埋facebook，以ZenZeKiunJoseph（陳樞機英文名）名義開戶口，入面有樞機嘅官方照片同牧徽，仲寫埋陳日君嗜好，希望冇乜教友辦錯告解啦。
據八方了解，近日好多人向陳日君查詢網上「疑似」主教Blog事件，令佢幾困擾，天主教社區傳播處主任容若愚透露，阿毛同陳日君相識，陳在2002年成立聖召小團體，協助年輕人分辨聖召，培育神職人員。呢個團體連阿毛在內共有四人，團體其後解散，成員不時同樞機聯絡，據知阿毛患有精神病，𠵱家入院接受治療。　

mailto:[email protected]