由韓劇《Remember》男星俞承豪、男團EXO成員Xiumin、高昌錫等主演嘅韓片《千面扭計王》大後日就喺香港上映，片中俞承豪飾演非常有智慧嘅千王之王，仲同Xiumin、高昌錫等組成最強詐騙黨，呃盡天下人。

問到俞承豪點睇自己嘅女人造型時，佢話：「扮演女裝時，覺得自己好醜樣，真係唔願意照鏡。本來對扮演女裝都有信心，但出嚟嘅效果真係令人感到害羞。初時係有憂慮，到正式拍攝時，得到勞苦功高嘅化粧團隊協助，令出嚟嘅效果更加漂亮。事實上我以為自己係好漂亮，因為大家對我嘅評價都話好漂亮多於好睇。但現實係，我點打扮都只係似一個男人。第一次着裙嘅感覺都係唔錯，覺得裙子好通風，好新鮮，呢個經驗令我感到好難忘。唔會再有機會，可以說係最後經驗了。」

今次佢飾演嘅金先達角色係韓國歷史係真人其人，俞承豪話自己當初對角色點呃人都覺得好奇，所以喺互聯網上做咗好多資料搜集，而導演亦希望佢可以參考里安納度狄卡比奧（Leonardo DiCaprio）喺《捉智雙雄》（Catch Me If You Can）中飾演嘅角色，所以佢亦睇咗呢部作品多次作為參考。

至於第一次拍電影嘅Xiumin，佢坦言好緊張，佢話：「擔心過自己能唔能夠勝任，但去到拍攝現場時，能夠同優秀嘅演員一齊合作，自己進行拍攝時可以好放心。拍攝嘅工作人員、導演以及一衆演員都對我好熱情，令我得以盡快適應拍攝環境。」片中佢同俞承豪嘅兄弟情十分感人，佢話：「確實地通過電影拍攝，我同俞承豪更為熟絡。喺電影範疇，佢係我嘅大前輩，私底下亦都係我嘅可愛弟弟...都會同對方問候，保持聯絡...遺憾係大家都好忙，唔可以成日見面。喺開始拍戲時，鏡頭下佢係我哥哥，喺導演講cut時，我會稱呼佢嘅名字，而佢就會叫我珉錫哥。既係哥哥又係弟弟，真係好有趣。」