以前啲人得閒就去酒樓飲杯茶、食個包，但今時今日，已經變成咗去cafe飲杯咖啡、嘆番件餅。去星巴克（Starbucks）呢類咖啡店嘆咖啡、睇報紙已經唔再局限年輕人，好多公公婆婆都喺咖啡店流連，有時仲帶埋孫仔孫女一齊，一坐幾粒鐘㖭！不過，有網友就唔係咁鍾意啲細路喺星巴克出現喇。
網友newmexichick喺《MSNBC》討論區入面講：「星巴克嘅環境主攻較成熟顧客，希望其他人唔好當嗰度係一個畀細路仔走嚟走去嘅遊樂場，尊重一吓想喺舖頭入面睇書同休息嘅人。如果有顧客嘅囝囝囡囡騷擾到其他人嘅話，請帶佢哋走。」

frappuccino當餐

而ss111就認為星巴克賣嘅飲品唔係咁適合小朋友，「我覺得細路唔應該飲咖啡，因為咖啡太多糖份同脂肪喇，當我見到啲小朋友喺星巴克將一大杯嘅frappuccino當lunch時，就諗佢哋點消耗600個卡路里？」
不過，身為星巴克職員嘅jp2RIP話，只要客人要求，都會為小朋友安排適合飲品，「我好樂意為小朋友提供蘋果汁或純牛奶，每次見到父母買咖啡畀仔女，都覺得唔係咁好，但我又唔可以阻止佢哋買嘢飲」。
網友mel_wags22就覺得星巴克係一個好啱家庭聚會嘅地方，佢話：「我個仔每個禮拜六都會好早起身，然後成家人一齊去星巴克飲吓咖啡，傾吓大家過去一個禮拜嘅生活，真係好舒服。」