新特蘭用新領隊執教已經唔係秘密，我求大俠噚日就講前查爾頓領隊古比士利好大機會上任接替執主席昆尼爛攤子，估唔到英倫傳來新消息，真命天子乃前曼聯隊長堅尼呢位猛人！
效力曼聯時攞過7次聯賽冠軍同埋4次足總盃錦標嘅堅尼，傳出將會出任新特蘭新領隊一職，雖然尚未落實，但佢同古比士利的確最有機會上任。
上季仲效力些路廸嘅堅尼，因為從未出任過領隊，功績當然不及古比士利，但球員生涯攞過無數獎項，雖然堅尼又係無牌領隊，但過去一年，國際球壇興起少帥呢股熱潮，好似奇連士文同尹巴士頓等，都為國家隊取得唔錯成績，所以堅尼就算毫無執教經驗，都唔代表佢唔掂。

堅尼昆尼愛爾蘭自己友

其實，堅尼同昆尼以前都係愛爾蘭國家隊成員，大家自己人應該合作上唔會有太大阻礙，而昆尼強調要搵一位可以帶領球隊取得錦標嘅領隊，以堅尼球員時代嘅豐功偉績，對「黑貓」要爭獎項嘅目標都有幫助。
如無意外，新特蘭喺下周一聯賽主場對勁敵西布朗之戰，將會由新領隊帶領下出賽力圖避免六連敗，如果到時堅尼真係成為「黑貓」領隊，佢嘅第一個對手正是另一位前曼聯隊長白賴仁笠臣，都算巧合。
「英倫球壇??家有唔少無牌領隊，好似紐卡素領隊羅達咁，無牌一樣帶領『紐記』取得好成績，所以堅尼就算無牌，都唔代表佢無料到，話唔定同佢球員生涯般，攞獎無數。