【本報訊】影帝梁家輝上月分享他一家人與外傭一起抗癌的動人故事，他昨接受《蘋果》電話訪問，並未責難解僱菲傭的僱主，「香港好多小家庭，真係afford（負擔）唔起好似我咁做，唔應該搵我嚟做例子」。根據梁家輝女兒上月在Instagram分享，其外傭Delia幫梁家打工30年，不幸於去年11月確診子宮頸癌，經數個月治療，終抗癌成功，故事感動很多港人。

無責難涉事僱主

雖然梁家輝體諒一些香港僱主未必能有財政能力照顧患重病外傭，但他說：「不過我哋應該諗吓，香港有菲傭幫咗我哋咁多年，政府公佈有成38萬人，呢班人嚟香港做嘢，除咗掙香港嘅錢、外匯返印尼、菲律賓之外，其實幫香港無數家庭解決好多咗困難。」

「大家憑良心諗吓，咁多年嚟，點解有咁多菲傭嚟咗香港？就係因為香港家庭嘅老人家、小朋友，都係靠佢哋幫忙，等兩公婆可以出去打工，將細路交畀外來傭人，大家應該從呢個角度考慮，而唔係一有事就『你返去啦』」。

梁家輝強調，不是責怪今次事件中的僱主，要持平去看雙方面情況：「幫到就幫，幫唔到就睇吓其他解決方法，施以援手。譬如話諗啲方法，唔好解僱佢，等佢仲享有香港嘅醫療福利，可以喺度醫病。而唔係將我攞嚟做例子，我咁做就人間有情，唔咁做就冇情嘞。咁樣對位僱主唔係好公平，病係人都有，唔通𠵱家醫療體系，你病重嘞，我唔收你，返屋企等死啦！一個社會唔應該係咁。」
■記者何永寧