馮仁昭聽聞除咗譚耀文有得留低、轉交畀經理人霍汶希(Mani)照顧之外,其餘四位藝人已先後解約。馮仁昭噚日同雷凱欣傾開,佢就話自己反應平淡,又話近排有唔少公司斟佢簽約,𠵱家就拍緊王晶執導嘅新片。其實王晶都有問過佢有冇興趣行性感殺入影圈,但佢就打算等到過埋年、諗清諗楚先再決定。
至於黎耀祥近年主力拍無綫劇,解約事件對佢影響唔大。祥仔話自己同Mani管理開嘅偶像歌手唔同市場,夾硬合作亦無謂,佢重抵死咁話:「我去公司周年聚會都尷尬啦,都係口靚妹口靚仔、Twins、Boy'Z,叫我祥叔咩?」祥仔話想享受吓「單身」生活,所以暫時唔考慮再簽經理人。