連續喺幾期專欄文章都係以抽CY水為題嘅曾鈺成，接受now新聞台訪問時直認鍾意抽水，坦承能抽嘅水都會抽，甚至「自己嘅水都會抽吓」，簡而言之即係無水不抽。而要數被佢抽水抽得最多嘅政治人物，肯定係CY啦，例如最近出英文字謎，暗寸CY狡猾，咁仲唔係對CY唔順超？但曾主席又堅稱，好支持對方施政喎，相信CY自己聽到，都會發出會心冷笑！
查實傳媒呢排不停問曾主席會唔會選特首，佢由自稱好老唔適宜參選到最近話「拭目以待」，又再惹人遐想；唔知係咪覺得俾人猜猜度度，係好玩之處？曾主席呢次喺訪問中甚至笑稱，自己性格適合做特首，因為特首要同各方面，包括中央政府及香港社會唔同背景、唔同主張嘅人，都有相當好嘅溝通途徑，自己都具備以上條件。嗱，曾主席話明「最緊要好玩」，認真看待嘅話，係咪個笑話？