土耳其球會比錫達斯周一宣佈，由於球會出現財政問題，因此被逼提前同隊中嘅葡萄牙後衛比比解約。

上季由皇家馬德里轉投比錫達斯嘅比比，合約原本到出年先至屆滿，不過比錫達斯星期一宣佈，由於球會債務增加，球會被逼削減開支，因此要向隊內最高薪之一嘅球星比比「開刀」，提前終止佢嘅合約。據報指比比同球會簽定嘅兩年合約，每年薪金達450萬歐元。

雖然比錫達斯今次請比比食「無情雞」，不過雙方今次都算係和平分手，比錫達斯就喺官網感謝比比嘅貢獻，仲祝佢未來一切順利，而比比亦都喺社交網站貼文，感謝球會上下一直以嚟嘅支持同幫助。

雖然比比就正式加入「失業大軍」，不過佢都唔愁冇出路嘅，日本傳媒就報道指，日職富豪球會神戶勝利船就有意簽入呢位35歲後衛，仲可能會簽埋前巴塞隆拿左閘阿祖安奴。神戶雖然中前場星光熠熠，不過上季嘅後防就好似豆腐渣咁，簽比比呢位後防硬漢就啱晒啦。
--------------------
新球季，新陣容！利物浦 FC 18-19季球星進駐《BFB》！立即帶領紅軍，踏上登頂之路！ http://bit.ly/2oQObi1
--------------------
《體蘋果》陪你睇波講波
https://www.fb.com/appledailysports