體育明星好多時都會被爆出一啲花邊新聞，但就好少好似利物浦嘅意大利前鋒巴洛迪利咁，新聞多到幾乎係源源不絕。今次「巴神」又搞邊科呢？原來係疑似喺社交網站撩球迷嘅女友，認真「曳曳」！

話說一位叫做JonatanIngi嘅球迷，佢喺twitter上載咗「巴神」喺instagram撩佢女友嘅cap圖，喺圖入面可以見到「巴神」要求個女仔將自己啲相嘅私隱設定改為公開，問人住喺邊個城市同埋幾多歲，點睇都係似想勾搭對方啦。不過「巴神」最後並唔成功，仲畀個女仔嘅男友將呢啲對話公開，叫大家睇吓佢點樣勾搭自己女朋友，唔知「巴神」睇到會唔會覺得自己「瘀」呢？！