難為黃藍定分界？

人人吹捧「黃色經濟圈」，排長龍撐黃店，冷不防黃到爆的龍門冰室老闆張俊傑一頭冷水照頭淋：「到底乜嘢係黃，乜嘢係藍？」他認為刻下劃分黃、藍店時太表面，着重的應該是公司背景、紅色資金及有否賺人民幣等，認為黃店更應利用額外所賺回饋抗爭者，「點解你叫黃店？因為你要撐佢哋。」與其搞「黃色經濟圈」，他物色志同道合者建構「良心社區圈」，由各路導師教授年輕人一技之長，以在被封殺的社會自力更生，持守着6粒字：「唔好對唔住黃！」

記者　許偉賢

「係咪整個checklist出嚟，（計）你有冇播《榮光》？有冇連儂牆？有冇派水？有冇叫香港人加油？如果10個中7個就叫黃？我覺得好膚淺……如果要分黃藍，我覺得係7：3，（公司）背景係7，表面（行動）係3」。訪問在銅鑼灣龍門冰室進行，張俊傑坦言推掉多個「黃色經濟圈」的傳媒約訪，除了因為現時的黃藍分類太表面，原來在他心目中，「黃色經濟圈」名稱「改得衰」，好像只談消費、不重回饋，有點市儈，「如果你係黃店，我原本賺100萬一個月，而家賺120萬一個月，我袋晒落褲袋，咁唔係『黃色經濟圈』囉！講得衰啲就係食人血饅頭，或者係，好經濟囉！」

「點解會有黃店？因為你撐年輕人、撐抗爭者；好嘞，當你係黃店，賺多咗錢嘞，係咪應該要諗吓，點樣用返賺多咗嘅錢去幫呢班年輕人？你賺多咗嘅錢，唔好袋晒，袋一半吖，拎一半出嚟幫年輕人。」他指中共正在抹殺15至30歲年輕一代的生存機會，「最好你哋﹙年輕人﹚唔好返學、冇知識，搵唔到食；就係想你哋死，死晒就換一批新血落嚟（香港），搞掂，大陸咗嘞，使乜搞反送中吖，搞掂咗你嘞。」

他認為當下首要協助年輕人「有返一雙手」，他正在建構的「良心社區圈」，就以培養年輕人一技之長為目標，與其派現金券派飯券，不如讓他們自力更生，長遠則或成立基金，協助被捕者家人，甚或透過成立公司等創造就業機會，他舉例指：「假如一個律師、一個醫生，因為行出嚟坐咗監，出返嚟好難喺同行搵食，如果有個圈，可以畀返嘢佢哋做」，「我覺得咁先可以解決問題，唔係而家所講黃色經濟圈、撐黃店，好似只係一味賺多啲、賺多啲。」

建構「良心社區圈」 助年輕人有一技之長

他特別提到黃圈不可有「山頭主義」或「大台」：「要一齊喺圈內諗：點樣幫到班細路？」指長和系創辦人李嘉誠不怕中共，「都係因為佢有好多錢啫」，若黃圈夠大至財力可匹敵幾個李嘉誠，「使驚你一個中共咩！完全可以抵抗到」，並指中共擅長分散、擊破，說不定會向市民大派「藍色消費券」，抵消杯葛效果，故此必須擴大黃圈實力。

別以為張俊傑只說不做，他有份創辦的「香港人嘅冰室資源分享中心」早已招攬導師教授年輕人手藝，訪問期間便有良心花牌師傅冒昧致電，自薦開班授徒作義賣，張收線後有感而發：「真係好多香港人想幫班細路！」該中心近日便聘請年輕人cold call致電小店，邀請及協助登記為飲食界選民，張指自己雖然反對功能組別，但也認為要搶佔每個平台，「雖然嗰票唔應該存在，但嗰票都應該搶咗佢」，故此無論雞蛋仔舖或碗仔翅店，「搶得一票得一票」；他旗下餐廳也會登記，希望與行家共同抗衡建制派。

自言是「政治白癡」的他同時也指飲食界代表、自由黨張宇人是「白癡」，「因為佢哋（建制派）只係一個舉手機器」。雞蛋果真可以撼高牆？張宇人2000年起盤踞飲食界，上屆更以逾1,800票擊敗民主派對手，「之前大家都係未瞓醒，而家瞓醒咗，就要喺能力範圍以內，選一位幫香港發聲嘅議員。」他承認有人叫他參選，但至今希望多花時間協助年輕人，「想幫佢哋有就業多過從政」。似乎未完全落閘？「呢個問題，唔好答嘞！」

-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
無懼警暴 學懂自救
《抗暴之戰●法例須知》讀果 上架
-----------------------------
【撐學生】
召集有心人 撐學生全年睇《蘋果》
立即按此