大台早前重播由張家輝主演嘅劇集，其中就有金句：「家咩姐啫？我姓甘㗎！」；嗱，血緣關係就真係冇得呃人，意大利米蘭體育報就選出8對餅印兄弟姐妹檔，保方、奧斯爾都有份，意大利門將保方同家姐十足十咁滯，想唔認家姐都唔得啦。

呢個選舉有兩個準則，必須是一男一女組合，即係兄妹或是姐弟，而且兩個人都係體壇界。祖雲達斯門將保方，成家充滿運動細胞就唔係新鮮事，佢家姐古恩達莉娜係前意大利排球國家隊成員，樣貌同細佬似到十足十。另一個餅印組合係阿仙奴中場奧斯爾，原來佢有個妹妹叫妮莎，亦都係踢足球，仲要一樣司職中場，亦都同奧斯爾咁大對眼。