醫學界選委今年爭崩頭，醫學會晒馬派30人競逐，又想同公院醫生拍住上，會長蔡堅誇口聯手嘅話，可喺30席中囊括最少28席，夠晒牙力同未來特首講數。不過公院醫生未應承，因為佢哋未必想跟醫學會咁，用民調決定特首投票取向，想候選人承諾規劃醫療人手最實際。
小圈子選舉選情特別熱鬧，家至少有五個陣營，醫學會（MA）話就算公院醫生唔埋堆，都有30人出嚟；西醫公會楊超發為首有十幾人；「關懷香港」嘅郭家麒串連五人，以撐普選做政綱；醫管局前高層高永文有「七君子」，公共醫療醫生協會（PDA）同前線醫生聯盟（FDU）預算有14個人出選，估計有逾70人爭30席。
PDA主席蘇潔瑩噚日話自己組隊去馬，不過，因為雙方要求未來特首重新規劃醫療人手訴求一致，雙劍合璧勝過單打獨鬥。