蔡卓妍 (阿Sa) 成圈中小富婆，多得Sa媽理財有方。Sa媽厲害之處還影響囡囡的愛情觀及人生觀，經歷過和鄭中基離婚、和陳偉霆甩拖的阿Sa樂於單身現狀，「我覺得好彩嘅就係由細個開始，阿媽教落女仔一定要有自己嘅空間、財富、興趣，無論有拖拍，定冇拖拍都好，都需要獨立，所以我OK㗎，有冇拖拍都OK。」

身邊人反而為阿Sa擔心，相識十多年的電影拍檔張智霖也為她做媒人，「佢十幾年前已經開始話要介紹個對象畀我識，到十幾年後拍戲，佢又係話介紹個對象畀我識，仍然係嗰條友！我喺呢十幾年嚟已經識咗嗰個人喇，但你明唔明呀？十幾年前佢話介紹嗰個人我識，到十幾年後我都係唔得嘅時候，就諗到嗰個人幾咁正啦，好好笑呀！」靜待上天安排，她反而出言安慰替她着急的朋友，「唔使擔心喇大家，要嚟就會嚟，未嚟到，自己都幾好。」

阿Sa在早前煞科的驚慄片《常在你左右》中，與張智霖對手戲最多，新一代型男林德信則飾演她的另一半，「林德信個爸爸，即係林子祥，同我個爸爸好似樣，我有時叫林子祥做爸爸，所以同林德信合作就好似同細佬合作咁。」

拍過多套恐怖片，阿Sa覺得拍攝時搞笑多於驚恐，「驚鬼？我又冇見過，唔知，但拍鬼片真係唔驚，咁多人喺度，反而有時有啲尷尬，你要扮到好驚，但隔籬又有燈光組，拎住塊反光板喺你前面，有少少搞笑。」讀劇本時，她也先被文字搞到失笑，要配合畫面才識驚，「套戲一開場啲人就死晒，我冇死，係一個遭遇好慘嘅女仔，男友意外被撞死，買間度假屋，諗住去養老，但嗰間屋又好多人嚟自殺。」

更多時尚、美容新聞，即上： http://add.appledaily.com