【六點半睇場●今日Read IG】迪斯馬利唔怕武肺照去中甲 索爆前妻艾祖娜成焦點
蘋果日報 2020/03/10 18:30
中國瑞士迪斯馬利艾祖娜深圳佳兆業今日Read IG
雖然中國由上年年尾開始爆發武漢肺炎疫情，令唔少外援都選擇逃離強國，但有人辭官歸故里，亦都一定有人漏夜趕科場。就好似瑞士國腳中場迪斯馬利咁樣，就唔怕死決定加盟中甲嘅深圳佳兆業，當然Read ig就好少講男仔嘅，今日嘅主角就係迪斯馬利嘅索爆前妻艾祖娜（Erjona Sulejmani）。
話說32歲嘅艾祖娜係一位阿爾巴尼亞籍嘅model，不過同迪斯馬利都分開咗一段時間，而當初掟煲嘅原因，艾祖娜都有公開咁講係因為床事不合，直指作為球員嘅迪斯馬利賽前寧願「食自己」，都唔會行房，所以唔係一個好情人嚟，最終兩位就分開咗。但即管係咁，艾祖娜依然會入場支持前夫，喺18年俄羅斯世界盃都有帶埋仔仔一齊入場支持前夫。
而艾祖娜出色嘅外貌同佼好嘅身材，入到球場當然就會成為大家嘅焦點。未來前夫就會投奔強國，唔知到時艾祖娜又會唔會帶埋仔仔一齊去到深圳，入場支持前夫呢？
ig：erjona_sulejmani
