DreamBear同前廉政專員羅范早排殺入流浮山小桃園酒家同新界人開餐，點知食出個大頭佛。呢個江湖飯局令到小桃園呢個鄉紳秘密飯局基地聲名大噪。查實呢，小桃園只不過係新界人用嚟招呼「外賓」傾嘢嘅地方。真正嘅鄉事終極飯堂，其實係位處元朗嘅喜尚嘉喜酒樓。呢間嘢係喜尚控股屬下嘅酒家，乳豬係佢哋嘅名菜，揸Fit人係賣豬肉出身嘅黃君武；佢太太劉蘭英同新界王發叔份屬老友。據聞呢間酒樓，發叔都有多少股份。所以呢，有乜要事商討，喺裏面傾特別有安全感。新界老友同八方講，呢間終極飯堂內有兩間廂房，等閒之輩入唔到去，鄉紳策動乜嘢行動，好多時都喺呢度密斟。