現年58歲的張天愛，父親張有興相當「猛料」，現於北京定居的她，每月會返港一至兩次，探望95歲老父張有興，還有女兒及孫女。訪問當日，Flora先帶爸爸張有興到中環見眼科醫生，雖然已屆95歲高齡，但張有興依然身壯力健，Flora稱：「佢家成熟咗，老咗就變番一個小朋友咁，要同佢講佢鍾意啲嘢，鍾意去書局睇書，睇電視又成日轉台玩佢，成日戴headphone聽歌，又寫嘢上網，I think it's good。同埋佢要好忙，可能以前做好多社會工作，佢好鍾意人哋搵佢幫忙，覺得有意義。」

影響價值觀
Flora又指，爸爸身體依然很好，會坐飛機去旅行，惟一是骨骼越來越收縮，故她要經常提醒爸爸要做拗腰動作，伸展膊頭。張有興當年是有名的「公職王」，Flora回憶小時侯，想見爸爸一面並不容易，更形容似去診所輪籌看醫生一樣。她笑說：「細個嗰陣成日見唔到佢，每日都好夜先返。去寫字樓搵佢呢，佢有三個秘書做唔同嘅嘢，門口三盞燈，着邊一盞燈，就邊個入去，好似係紅色、綠色、橙色，交通燈咁。我哋去見佢，都要好似睇醫生咁，排隊輪籌。」
提到爸爸當年同時任職市政局、立法局及公民組織及營運自己公司，代理Breitling、Omega等品牌，忙到不得了，Flora坦言影響了她的價值觀：「我細個就覺得原來爹哋可以做好多嘢，我將來都要學佢咁開三盞燈。」

「時間買唔到」
事實上，Flora現在亦十分忙碌，既要從事文化藝術工作，又要兼顧「天愛基金」及教舞拍片，拼命去過忙而充實的人生，Flora表示：「媽咪當年過身時，講咗一句影響我好深，佢話『時間係買唔到，每一分一秒，所以你要盡做你想做嘅事！』」
Flora在9歲時，成為亞洲第一個進入英國皇家芭蕾舞學院的女生，24歲擁有三個個人時裝品牌，由舞蹈家變設計師，再變藝術搞手，擁多元身份，近年她搬到北京長住，養育及栽培其「天愛基金」名下過百孤兒，全因一顆困不住的自由心。