太極樂隊合作咗三十年，唔好諗住佢哋經已好夾，直到今日開會時，仍然係會拗到火紅火綠，今日佢哋去到中環為五月底紅館兩場演唱會舉行記招，成員就踢爆鄧建明（JoeyTang）同唐奕聰（Gary）開會時，為新歌嗌交，Gary仲將手上玻璃杯拍落枱，整濕身邊啲人，幸好事件維持咗一分鐘就冇事，Gary笑住話：「夾Band就係有乜要當面講，唔使放喺心。」JoeyTang都認同放喺心太耐，就變成心病。

今次演唱會兩晚都唔同Rundown，每晚都會唱成七十首歌，舞台會以三面台設計，為求同觀眾拉近距離，佢哋諗緊可否將舞台變成斜台，延伸至觀眾席，概念似飛船降落咁。

記招上黃柏高特意送上一個殞石獎座畀佢哋，喻意佢哋嘅歌似殞石咁打入Fans嘅心，而好友溫拿、黃秋生、許志安等都有錄片祝賀。講到今次演唱會有一節係以音樂劇形式去做，佢哋透露搵緊一位得高望重，喺舞台劇界有份量嘅人，負責做旁白部份，講到對方係咪有份錄賀詞，佢哋即刻笑，似乎就係指黃秋生。