喺成個10月份都未贏過場德甲嘅多蒙特，嚟到11月終於反底。前晚佢哋作客漢堡，結果食到飽一飽，憑住奧巴美揚大四喜大勝5:2。
奧巴美揚之前因紀律問題而俾教練杜曹雪藏，冇得喺上周中嘅歐聯分組賽披甲。不過喺上周六德甲就獲解凍，以正選姿態上陣。呢位加蓬射手亦踢出爭氣波，喺四、22、28同埋48分鐘建功，加上後備登場嘅奧士文尼迪比利亦入一粒，最終作客大勝5:2，結束聯賽四場不勝走勢。奧巴美揚賽後話：「我梗係開心啦。我哋四場聯賽冇贏過，所以呢一日對我哋好重要。」另外，禾夫斯堡亦翻身成功，靠前鋒馬里奧高美斯梅開二度，作客3:0大勝弗賴堡，結束聯賽八埸不勝兼攞到自八月底以來首場聯賽勝仗。

拜仁五連勝斷纜

多蒙特同禾堡反底成功，但拜仁慕尼黑就連勝斷纜。同日拜仁主場對住賀芬咸，靠對手中場史堤芬蘇巴擺烏龍逼和1:1，五連勝走勢告終。佢哋失分之餘，仲有中堅謝路美保定喺82分鐘傷出，賽後證實佢膝頭同埋鼠蹊都有問題，將會缺席德國嚟緊對聖馬力諾嘅世盃外，同埋對意大利嘅友賽。