當年今日
關於我們

馮仁昭四圍超:六嬸搵幾米畫花TVB沖喜

蘋果日報 2006/08/04 08:00


無綫掌舵人邵逸夫(六叔)上個月因為肺炎入院,留醫一個禮拜之後,前幾日已經出院。不過佢老人家一出院唔係返屋企休息,而係同六嬸方逸華約埋老友劉家昌、甄珍同張玉珊走咗去半島酒店歎茶,同枱仲有台灣著名繪本畫家幾米。
馮仁昭當時都好奇怪,點解六叔六嬸無啦啦會約埋幾米飲茶?原本以為佢哋傾合作拍嘢事宜,幾經打探之下,先知原來六嬸想搵幾米幫無綫粉飾吓將軍澳電視廣播城,打算喺外牆畫畫。聽講幾米𠵱家仲考慮緊,未知成唔成事。
幾米喺港台兩地都吃得開,著名作品有《向左走.向右走》、《地下鐵》等。如果佢應承六嬸嘅話,肯定令電視城外觀生猛晒,員工做嘢嗰陣都會醒神啲,六叔就繼續掌管TVB。話時話,咁啱近期盛傳無綫放盤,莫非六嬸想執靚無綫個外殼,好似人哋賣樓之前裝修吓咁樣?諗諗吓,幾米個名讀起嚟有啲似「幾有米」,咁老黎,係人都鍾意啦!