星期日係母親節，華華前幾日同「玩具大王」蔡志明位公子加讚傾起，佢話，「嗰日會早少少起身陪媽媽，如果媽媽去教堂就陪佢一齊去」，認真乖仔！佢仲話，晏晝嗰餐由細路煮嘢畀大人食，之後就同媽媽去遊船河或者行山，夜晚會買個蛋糕同婆婆慶祝，節目認真豐富！
後生嗰輩諗定晒節目，至於稍為年長嗰輩又會點？侍母至孝嘅大劉劉鑾雄，每年都會帶女友同媽媽去「富豪飯堂」福臨門，今年睇怕都唔例外。華華問過福臨門嘅徐德耀，好似大劉同東亞（023）主席李國寶呢啲熟客，母親節訂咗枱未，佢話名就唔開嘞，但「今年市道好，熟客早一、兩個月前已經訂位，母親節正日啲枱一早爆滿，通常訂大枱，夠成家人一齊坐。」

大劉寶哥哥常光顧

咁富豪去福臨門會食啲乜？原來同華華一樣，快靚正叫套餐。當然富豪請阿媽食嘅套餐，同華華孝敬母親大人嘅就梗有分別啦，最大分別咪就係價錢囉！徐德耀話，富豪食慣山珍海錯，套餐菜式離唔開鮑魚、魚翅等高級食材，「平日下午一般消費每位300至350蚊，晚飯就800至1200蚊。平時已經食得好好，母親節食嘅同平日差唔多。」
福臨門今年幾款12位用嘅套餐，最貴嗰款盛惠兩萬六千八，「易路發」好意頭！菜式包括每両300蚊嘅白燕盞，每位有二両，仲有25頭日本吉品鮑，每隻成1850蚊。
通脹猛於虎，加上日本地震令到好似日本吉品鮑呢啲矜貴食材價格飆升，所以今年套餐都加咗價，舊年最貴嘅套餐12位用2.18萬銀，今年加咗5000蚊，加幅23%。不過，幾千蚊對富豪嚟講，濕碎！

李華華
mailto:[email protected]