韓片《屍殺列車》挾韓國首部喪屍災難片之名而大受歡迎，喺韓國公映僅19日就極速破千萬票房，亦帶挈戲中眾主演如孔劉、馬東錫、鄭有美等人上位。馬東錫近日更成為化妝品牌「Etude House」嘅新代言人，日前仲孖另一代言人f(x)成員Krystal拍攝新廣告0添。

「Etude House」嘅商品一向行少女路線，所以現年45歲嘅馬東錫都要化身「馬可愛」扮Cute。日前有網民影到馬東錫喺舖頭拍攝廣告嘅情況，只見馬東錫着住粉紅色嘅圍裙，認真地聽導演講解後，就做出誇張嘅動作同表情，相當搞鬼。而品牌負責人表示：「馬東錫喺劇集、電影一向畀人好男人嘅感覺，今次佢就透過廣告展現出佢嘅另一種魅力。」

而馬東錫有份主演嘅《屍殺列車》同樣喺香港亦有好成績，雖然上周四先正式喺香港公映，不過計埋優先場同預售，截至今日晏畫6點，累積票房已高達1,885萬港元。

另外，「Etude House」另一代言人Krystal嘅家姐Jessica因長期受網民嘅惡性評論攻擊到難以忍受嘅地步，日前親身到警局遞交起訴書，起訴兩名網民。