立法會再次干擾行政主導，向政府施壓，通過所謂議案，迫政府在全港政府建築物、勒令所有學校升五星旗及推行「愛國教育」！
民政事務局局長何志平，一向傳聞做得唔係太開心，處境弱勢，估唔到今次肥平佢反應優質，嚴正指出：「以行政命令去強制升掛國旗，並不恰當，只會適得其反！」
肥平今次嘅講話，體現強勢行政主導，十分難得！唔怪得中央人民政府指定三司十一焗全體要留任，包括肥平，單憑肥平頂回立法會呢個搞笑議案，可見中央及壽爺攬肥平，係幾有眼光！
至於強制全部學校掛旗，就更加無知！香港有英童學校、日本人學校、山頂德國瑞士學校，全部都係特區高官仔女讀書嘅心中首選。叫英、日、德、瑞，加埋西灣河嗰間韓國人學校，通通扯五星旗，強制叫所有外籍校長、教師、學童，向一支中國旗幟致敬，呢個政府係咪癲咗？

愛國發自內心　使乜推行教育？

親中政黨此時搞咁嘅小動作，同「愛國」無關，而係玩嘢，別有用心，挑撥離間，趁勢整蠱吓榮獲壽爺揸手十一秒、同時又係天主教徒及英國爵士嘅當撈曾！若然爵士膽敢抗拒，就有小報告打去北京，話嗱嗱嗱，睇吓，都話呢條友係餘孽嘅喇！
若然聽咗佢支笛，咁佢以後郁唔郁就「立法會動議」，抨擊政府唔夠「積極」推行佢所講嘅「愛國教育」，今次話要勒令在全港學校設壇拜祭毛主席，明日又話強制每次周會向胡錦濤肖像立正三鞠躬，幾時俾佢煩死？
愛國要發自內心，順其自然！曾慶紅副主席同霍英東都講過：香港人絕大多數愛國！既然係愛國，重使乜「積極推行愛國教育」？行政主導，何物立法會？
就算幾時升旗，幾時輪到一兩個充滿怨憤嘅政黨指手畫腳！柴米油鹽，解決就業，政府有好多嘢急市民所急，扯唔扯旗，並非民生優先，更唔輪到立法會妹仔大過主人婆！
肥平洗底挺身代煲呔硬接老左一記暗棍，有分加，呢啲忠僕，煲呔要重用多啲喎！

傳真︰2623-9278
電郵︰[email protected]