冠軍練馬師大摩今季成績倒退，佢把口就話馬房處於換血調整期，惟佢照樣出擊贏馬向馬主交代。
2016年大摩連勝頭三次賽事，直至剛周三谷草至捧蛋斷纜。這天回師沙田跑到第七場三班泥地1200米，大摩靠「海紅寶」一放到底，為馬房重新贏馬，此駒由老牌馬主香港高爾夫球會賽馬團體擁有，自上季4月中由韋達開齋後，一直用大師傅贏唔番，呢鋪刻意初配黃皓楠減十磅，結果藉場地濕滑之利貼欄帶到，爆12倍冷Win取得今季首捷，五歲馬首次用華將兼牌仔即贏，組合獨贏開A2派27.5元，亦見證大摩同黃皓楠歷來首度合作報捷。
這天之前一直畀外籍騎師玩晒，呢場泥地開出全日首條華將Q，跑第二為楊明綸座騎14倍「藍天堡馬」，Ｑ派714元。雷神騎後備補出馬「心花怒放」大熱只得第三，人馬無緣連捷於泥地1200米，第四名則由柏寶騎冷門「舞林高手」後上拎到，四重彩派九萬四千幾。