來生是否再做香港人，還是留待下一世才決定，不過做了20年舞台劇演員的潘燦良初嚐拍劇滋味後，卻恍如過了另一段人生，對於獲得網民讚賞，更被高登絲打捧為『最想下嫁嘅男人』，阿燦坦言從未預計有這個反應，他笑說：「我估唔到咁熱烈，以前都好少睇（網上留言），直到有導演編審send條link畀我先知，編劇好成功，其實呢套劇本身唔係講中港矛盾，設定喺兩地分隔咁多年嘅姊妹，生活之中面對係人同人之間關係嘅問題，將呢啲分隔兩地嘅小衝突，擺咗喺呢套戲裏面。因為咁貼身，所以先會令觀眾一路睇一路好有feel。」

會繼續拍劇

入行20年的阿燦，今次轉投電視框演出，他直言覺得感覺新鮮又刺激，不過為何事隔多年才有這嘗試，他說：「我啱啱畢業試過鏡，係佢冇話簽我，而我又入咗話劇團，加上以前同電視台冇乜機會接觸到，佢哋有自己旗下藝人，唔會刻意去搵外人拍，所以冇乜人會留意你係邊個。」
相信會繼續拍劇的阿燦仍然愛舞台，更指電視劇好劇本難求，他說：「好似今次拍劇，有啲人好期待我去拍，但係有啲人唔想，佢哋覺得做舞台好似矜貴啲。不過我覺得放低越多，得到越多，拍完呢套戲我試到觀眾個口味，亦都享受咗工作流程。第一次拍劇遇到咁多好對手同團隊，觀眾又鍾意，真係好難得，我好彩遇到，最後連觀眾都好鍾意，好感恩。」
作為一個土生土長的對香港仔，阿燦並不否定中港交流，但仍希望保留多點本土色彩，他說：「呢個唔等於要獨立，北京、上海同廣州，都係屬於一個國家，但係佢哋都有自己嘅特色，所以香港應該都有自己特色，我哋已經有百幾年殖民地嘅歷史背景，呢個唔可以否定。好似我喺香港出世，你問我嘅話，能夠包容係明白點解你哋係咁，但係你話要我變成你哋咁，又或者要你嘅嘢變成我，我諗我唔會接受，我覺得應該係大家能夠尊重對方，畀大家一個空間，唔一定係唔係你死就我亡。」
撰文：何慧斯