英劇《新福爾摩斯》（Sherlock）第四季元旦就會播出，喺開播之前傳出壞消息，扮演華生嘅馬田費曼（Martin Freeman）日前受訪時宣佈，同劇內扮演佢老婆Mary嘅真實女友Amanda Abbington分手，結束16年感情，兩人育有兩子女。

馬田日前接受《金融時報》訪問時表示：「我同Amanda唔再一齊喇，分手得好和平，我永遠都愛Amanda。」馬田同Amanda一直對關係保持低調，佢暗示自己近年嘅名氣可能影響到段感情。數日前劇組於倫敦出席活動時，馬田同Amanda大合照時都企埋一齊冇避忌。

喺《新福爾摩斯》第四季中，華生同老婆生咗BB女，將會與扮演福爾摩斯嘅英國男神班尼狄甘巴貝治（Benedict Cumberbatch）有趣怪嘅互動。