《徐小鳳走過順逆流，依然金光燦爛2014演唱會》噚晚喺紅館舉行第二場，嘉賓有費玉清、盧海鵬（鵬哥）同陳奐仁，鵬哥出名係扮野王，以前都扮過好多次徐小鳳，噚晚佢戴個假髮，著上波點裙襯涼鞋，一出場以日文唱出《柔道龍虎榜》，七情上面，然後就叫自己做大鳳，仲話：「你成家姓徐都嚟撐你場，和音有姓徐，我又姓徐，音樂領班又姓徐，全部除清光。」

小鳳姐聽到「大鳳」咁講，都忍唔住笑：「你知唔知當我第一次喺電視機見到你著我件波波點行出嚟時候，我個心情好複雜。」鵬哥搶住話：「嗰時仲著得落，依家件衫好窄，唔知點解件衫唔啱著，凸晒個肚腩出嚟，都唔使戴嗰啲嘢（胸圍），呢個我自己嘅！」小鳳姐問鵬哥：「聽講你去咗買胸圍？」鵬哥話：「我依家都唔啱著，如果戴埋落去就死火。」小鳳姐話：「每次見佢著成咁我開心又傷心，佢著到好似藥膏咁。」引得全場大笑。

台灣歌手費玉清則指小鳳姐係佢嘅啟蒙老師，仲話每次登台都會唱小鳳姐嘅歌，又賣口乖話：「小鳳姐身材十足美人魚般線條優美。」小鳳姐講笑話：「借畀你著你都一樣優美，我啲身材係綁出嚟嘅！」