2011年中港地產市道會係點？里昂房地產研究部主管王艷話，內地嘅地產市道雖然未至於一片頹垣敗瓦，但係地產商嘅前景，就似一塊空地而唔係摩天大廈，3月更加會有一番驚心動魄嘅體驗，10月就有賣地好成績。咁香港又點呢？佢估計住宅市道歡欣不再，但係寫字樓同零售商舖就仲有一絲生氣。
之但係買樓置業依然係大家最關心嘅課題，咁金兔年買邊一區啲樓會有運行呢？里昂話，由風水角度睇，最重要嘅係方位、方位，同埋方位！講緊嘅唔係物業本身嘅地段，而係幢樓相對太歲、五黃、三煞等主要能量嘅方位。里昂又話，如果幢樓對正兩個狹長煞位，大家不妨大幅殺價；另外，雖然西方係新一年嘅順位，但係有三煞星盤踞，所以都係唔好輕舉妄動！