神聖嘅奧運聖火5月2號喺香港傳送，負責統籌聖火傳遞嘅民政事務局密鑼緊鼓打點安排，除咗擔心藏獨、疆獨、台獨、港獨分子示威外，搞手仲有嘢頭痕，就係特首煲呔都要玩埋一份，親自做火炬手傳遞聖火第一棒。

煲呔跑第一棒有乜唔妥呢？老友話畀八方知，根據慣例，奧運聖火所到之處，首先由當地官方第一把手接收火炬，再交畀運動員或代表開始傳遞聖火，早幾日胡主席喺北京接過火炬，轉交劉翔，劉翔就係「中國第一棒」嘞！聖火傳到嚟香港，如果照搬北京做法，第一棒應該係運動員，煲呔不假手於人，即係霸咗「香港第一棒」呢個歷史地位。
八方收到風，有人對煲呔咁做睇唔過眼，況且近排政圈大潮流係交棒，煲呔唔交棒於理不合。有知情人士則幫煲呔解畫，指內地多位省市領導人都會做埋第一棒火炬手，煲呔只係跟大隊啫，絕非玩特權。八方對此講法不以為然，事關保護聖火要求零失誤，𠵱家要兼顧埋煲呔人身安全，豈非危上加危？一哥鄧竟成負責任嘅話，理應犯顏直諫，免得節外生枝。

聖火傳遞保安不容有失，警方已購備1,000個可隨身攜帶嘅輕型滅火筒，5月起採用，以防示威者亂點火頭。今個月18號會實地演習，傳遞當日沿途大規模封路，甚至限制市民進入，一般人未必有機會圍觀親睹歷史性時刻。全港120位火炬手更加係千挑萬選，八方知道新上位做人大常委嘅范太有份，華資大地產商都有代表，18區每區推選一人接力，應該冇預民主派。
傳遞聖火步步為營又擾民，既然煲呔咁「恨」做火炬手，八方建議畀佢一個人玩晒，唔使勞師動眾玩轉港九新界，佢喺禮賓府內左手交右手咪得囉！由睡房出發跑去廚房，再轉出大廳，跟住直入「特首辦（大事）辦公室」，即係洗手間，最後一站係圍繞錦鯉池跑28個圈，象徵2008北京奧運圓滿舉行。
只要一哥駐重兵包圍禮賓府，八方保證煲呔傳遞聖火時唔會中伏兼且百「獨」不侵，藏獨、疆獨、台獨、港獨等分子，極其量只可以喺禮賓府外叫囂，休想闖入干擾神聖嘅傳遞聖火任務。聖火象徵「中國人百年奧運夢想」，傳遞過程有乜差池惟煲呔是問，聖火不可熄，特首可以換，煲呔做火炬手，要醒醒定定。
mailto:[email protected]