一次錯誤足以前途盡毀，唔少英國網球fans都會為現時男單世界排名50嘅27歲球手伊雲斯（Dan Evans）感到可惜或者憤怒。呢位2015年英國台維斯盃冠軍隊成員喺本周較早時間得悉，喺4月24日巴塞隆拿網賽賽後藥檢被驗出對可卡因呈陽性反應，國際網球聯會（ITF）宣佈佢將會由下周一（26日）起暫時被禁參賽，最高可能會面臨4年停賽！伊雲斯周五公開道歉，但否認事件同提升比賽表現有關：「我犯咗錯誤，必須承受結果，但你哋要明白，呢件事同網球比賽無關。我令好多人失望，包括家人、教練、團隊、贊助商、英國網總同球迷等，我只能由衷從心底道歉。」

至於周五哈雷網賽，瑞士「天王」費達拿同德國新星施華利夫雙雙晉級4強；英國皇后會盃網賽方面，施歷、狄美托夫、盧比斯同基利斯梅拿躋身最後4強。