當年今日

自認忽冷忽熱 拒同居結婚
城城絕熊黛林坐正念頭

蘋果日報 2007/09/22 00:00


事業上,無論高低起伏,郭富城都不斷向前飛,從沒瞬間停頓過。
感情上,誰不想有個好依歸?都41歲了,無論身邊有多少異性來又去,他卻沒有為此打算過,即使在他口中「很close」的好朋友熊黛林,也只是一場「正常社交」,理由是「高人話我冇夫妻宮」。
正所謂風水佬呃你十年八年。事實應該是他要自由,他不想停泊,只要飛。
喔噢,原來舞台王者是一隻冇腳雀仔!郭富城聞言,只含蓄地笑一笑。 撰文:蔡如玉 協力:陳月媚
這天,郭富城為新戲《C+偵探》宣傳,由中午12時到晚上12時,不停接受傳媒訪問,夜半收工,城城總結:「今日大家離不開問我感情問題,我同全部人都講,高人話我冇夫妻宮。」沒有夫妻宮所以沒有結婚念頭,所以不要再在感情問題上糾纏了,算是在耍太極?算是modelanswer?這答案說給傳媒聽,也可以說給他的一眾「異性朋友」聽,很好用!
所謂「異性朋友」,現在要對號入座當然非熊黛林莫屬,假如相戀傳聞一開始就屬實的話,41歲的城城和這位26歲來自內地的當紅名模,拍拖至今已有10個月,發展順利的話也該步入穩定期,但今天城城卻口口聲聲說自己沒有女友,很久沒有拍拖,腦內從沒閃過結婚念頭,難道二人有暗湧?
「風水佬話我冇夫妻宮」
一整天被問了不下十次「與熊黛林是否拍拖」此等問題後,城城一副做好準備的模樣,開腔談感情,不過已是一個結論:「我前幾年睇風水,風水佬話我冇夫妻宮,冇得打破嘅,有都要好後先有,所以我嘅性格係咁行,人哋拍拖會諗結婚生仔,我一啲都冇,咁耐以嚟,結婚呢個念頭喺我腦度閃一閃都冇,我亦唔恨生仔。」
無論如何也要問一次,到底城城是否和熊黛林拍拖?他快速回答:「好朋友,正常社交。」肯定不是男女朋友?他說:「唔係嗰種感覺,其實我冇諗,大家係好close,得閒約傾偈食飯,但未到一日不見如隔三秋嗰種,我自己都忙啦。」城城聲稱多年以來都沒有拍拖:「異性朋友就有,有啲人係咪終身伴侶,我從來冇諗過,亦從來唔會畀對方感覺到有將來。」每次談到熊黛林,城城的態度都不一樣,予人有點忽冷忽熱之感,他也直認:「係忽冷忽熱,我性格係咁。」說不想拍拖、沒打算結婚,說到尾其實只是還沒遇到深愛的人,城城謂:「可能係啦,以前我都有啲異性朋友幾好,自己都幾喜歡對方,但我真係唔會諗呢啲,或者未遇到好愛啦!」
empty
假如傳聞屬實,郭富城與熊黛林一吻定情,再過兩個月便拍拖一周年。 資料圖片
「紀香結婚我冇遺憾」
藤原紀香傳聞也曾是城城女友,這位愛人已經結婚了,城城怎樣看?他說:「當然開心啦,我哋係好好朋友。」她會否是一眾異性朋友中最正的一個?城城說:「唔係……你覺得佢正……我認識嘅佢各樣嘢都好好,好有愛心,佢結婚我冇遺憾,或者我真係驚結婚要負嗰種責任,𠵱家都好享受一個人,有時間就約朋友打波,一啲都唔寂寞,人哋有老婆煮飯有仔有女,我一啲都唔羨慕,好似Chilam(張智霖)咁,去打波都要打電話問過阿靚(袁詠儀),佢好enjoy呀,但我好同情佢,我羨慕自己咁自由。」
萬一有女友想結婚,城城會如何處理?他說:「所以我會同啲女仔保持一個距離,傾得埋都要有距離,同居一定唔會先啦,同居等同畀咗名份佢,暗示咗大家嘅關係。𠵱家工作分散我注意力,我唔覺得寂寞,電影同音樂已經充斥晒我好多時間。」然後,城城重複又重複,說自己沒有夫妻宮,從不想結婚,傳媒們會知難而退,這個訊息,熊小姐收到了嗎?
empty
郭富城與藤原紀香曾經因合作而墮愛河,對於舊愛結婚,城城送上祝福。 資料圖片
挑戰《色,戒》
「或者露股先」
得過三屆最受歡迎男歌星獎,連續做了兩屆金馬影帝,也曾被戲稱「谷底天王」,郭富城入行22年經過高峯,歷過低潮,今日心態豁然開朗,他用「燈」來比喻人生,城城說:「一個人好似一盞燈咁,唔可以永遠都着,有時要熄吓,如果唔係會燒壞,我𠵱家又着咗。」
「以前好緊張獎項」
這盞燈再閃亮,多得張叔平在《三岔口》為他做美指時按下開關掣,城城說:「阿叔知我轉變中,佢幫我造型嗰一刻,我已經將偶像包袱放下,經過01至04呢幾年,我適應咗自己,改變自己同放低咗自己。」
改變,包括調整事業步伐與方向,歌手身份的城城只管衝衝衝,他說:「以前唱歌好緊張獎項,最攰係做宣傳,完全冇自我,我哋嗰個年代所謂四大天王,喺舞台上要不斷將最優秀嘅嘢攞出嚟,唔夠人優秀就會被淘汰。最受歡迎男歌手我都攞過咯,音樂上嘅目標算完成咗,嗰啲歲月過咗。」城城續說:「呢兩年發覺拍戲畀我嘅滿足感大好多,搵得到自我,所以我工作上嘅比重,音樂唔及電影多,但都唔會放棄音樂。」
「喺新片冇乜點着」
全情投入在電影世界,城城接戲有沒有底線?抑或可以像《色,戒》中的梁朝偉般全裸?他說:「首先要對導演有信心,有好劇本,如果譚家明呢類導演,當然冇所謂。我同關錦鵬食飯時都有傾過呢個問題,赤裸嘅感覺喺東方社會,尤其係香港,大家對電影同演員,睇嘅角度唔同外國演員咁普通,外國人覺得冇問題,香港同亞洲市場就要小心處理,偉仔帶起咗個頭都好,但佢都係一步一步嚟,由《春光乍洩》、《2046》先到《色,戒》。其實我喺新戲《白銀帝國》有一場戲,女主角全裸喺我面前,我就有個剪影,都冇乜點着,呢個或者係開始,逐步嚟啦,或者露股先,唔好第一次就『啷啷』都見埋啩!」
炒股蝕千萬喊驚
娛樂圈這口飯從來不易吃,因為你不知道觀眾何時會捨棄你,保險一點最好鋪定後路。城城說:「我冇生意頭腦,亦從來冇人搵我一齊做生意,我唔係嗰種材料,投資又唔識,股票地產更加唔會掂。我享受做演員,呢個係我終身職業,退休係好長遠嘅問題,除非拍戲拍到攰,但𠵱家先係開始,我好有衝勁。」
「見過鬼怕黑」
城城自言不諳理財,90年跟大圍投資網股損手,讓他對股票望而生畏,「嗰陣我唔識又跟人買,一爆煲蝕都要放,輸咗過千萬,好傷呀,以後都唔敢掂股票,見過鬼怕黑嘛,𠵱家個市升到嘭嘭聲,我都唔恨,情願安守本份。」
雖說離退休還有很長一段路,但城城多年的積蓄,即使現在不做也不愁生活,「歸於平淡嘅生活使幾錢啫?我又唔會豪使,平時都冇乜嘢買,𠵱家一個月使唔到十萬,啲車又好少揸,保養都係有限錢,沈嘉偉去咗大陸發展,我哋好少見,少咗人同我傾車,都冇買啦。」
攝影:葉君海
服裝提供:agn囗sb.
場地提供:JIABoutiqueApartment
empty
90年炒股票蝕了逾千萬後,郭富城已不敢再玩。
empty
舞台王者郭富城打算自創一齣歌舞並重的音樂劇,現已籌備至改劇本階段。
empty
郭富城自言年前獲高人指點,說他婚姻運遲,他也表示從沒想過結婚。
empty
四大天王各有發展,城城表示視演戲為終身事業,沒有打算鋪後路。
empty
城城表示看見好友張智霖(右)要向太太袁詠儀報告行蹤,便很滿足自己單身的自由。 資料圖片
empty
郭富城轉戰影壇後,連續兩屆成為金馬影帝,事業因而再攀高峯。 資料圖片