【整條舌頭割下】舌癌變淋巴癌 洪朝豐面頰肌肉硬化 前妻不離不棄
洪朝豐舌癌橙汁電療味蕾
洪朝豐接受電療後,生活遇到好多障礙,連飲橙汁都係鹹嘅。
洪朝豐舊年發現患上舌癌後做手術割咗3份2條脷,點知癌細胞擴散到淋巴。(新聞連結: http://bit.ly/2GZWMXp )現時洪朝豐接受電療,但佢仍不時喺facebook發表抗癌感受。
今日,洪朝豐再於fb發表近2,000字嘅文章《樹猶如此》,稱自己因為癌症而令面容改變,嗓音一去不返。佢寫話:「手術以後,我已非我,一切變天。樣貌已改,嗓音已軋,無復舊容。我的嗓音,一去不返,別矣。如今含混不清,支離破碎…那個昔日風華灼灼的DJ,一去不復返了。別矣。我如今已經坍倒,失魂落魄。」
洪朝豐文中又再講到因為舌頭腫脹,嘴角成日流口水,瞓覺時要喺枕頭放紙巾,成日濕咗要換,搞到佢瞓唔到,有時啲牙會咬到條脷令到佢痛。
之後洪朝豐又講番之前切脷手術:「我做的手術,是個大手術,歷時20小時。醫生先在喉嚨頂處開刀,然後,將整條舌頭割下,從口腔中取出,割去腫瘤後,再用口腔內的組織,和左大腿內側肌肉,改造,復修,然後,重新安裝入口腔,縫針。手術以後,醒來,從此喉嚨卡着,壓實了,每吞口水,覺得吃力。左邊頸的淋巴,還動過手術,醫生開一條長長的刀疤,割出24粒淋巴核,發現其中4粒,已有癌細胞。我得了淋巴癌。手術傷了神經線,我左邊面頰以下,部分肌肉硬化,如石塊,兼之麻痺,麻痺甚至蔓延,直至左肩前面一大塊。」
洪朝豐稱,如今每日要7支營養奶維生,體重由150磅跌至136磅,前妻葉桂好好心照顧後,結果體重升番到142磅。而電療過程中副作用陸續出現,包括口水腺被破壞,出現口乾症,而味蕾亦喪失咗對甜味嘅感覺,喝一杯橙汁係鹹,然後條頸開始發黑,醫生話係永久性嘅。最後,佢話到喺朋友家寄養嘅荷蘭森樹,原本綠葉青葱,玉樹臨風,但突然枯死,可憐兮兮。佢話:「一切,已經完結。樹知我心。樹猶如此。」