愛無分性別、界限，早前宣布「出櫃」嘅香港著名時裝設計師鄧達智（William），同拍拖一年嘅外科醫生男友陳梓欣(Clement)，將於本周六(9日)舉行訂婚！但有消息指，其實當晚，二人係舉行結婚同擺婚宴。

William早前趁男友生日，瞞住所有在場朋友，將生日宴臨時變成訂婚宴，有消息指William會將今次訂婚宴照辦煮碗，將9號嘅訂婚宴改為婚宴，大宴親朋。雖然William早前講過：「我獨身多年，仍未接受結婚這個概念！」但由於早前嘅訂婚派對，唔少缺席嘅朋友，都呻話錯過咗見證兩人重要時刻，為免顧此失彼，所以鄧達智決定補辦婚宴，而9號當晚婚宴，會定於尖沙咀舉行，屆時將宴請200名親友，包括好友鄭文雅、惠英紅同馬詩慧等，而盧覓雪就會擔任司儀。

另一方面，由於香港暫時未有同性合法婚姻，因此二人已決定下年到英國註冊，正式成為合法伴侶。