係咪新產品就見仁見智,形式一樣,裏面梗係有你愛我,我愛你;你打我,我打你;你憎我,我憎你。但係次次都梗係有啲嘢唔同,可能係演員組合,可能係拍攝手法。如果我新到拍套「逃出太空」,我估你都唔敢睇啦,不過大家唔使驚,我未諗到太空外面係乜嘢。所以係咪有新嘢對電影嚟講其實唔係最重要。
做工就真係要睇過至知,我唔相信一部戲會純粹因為拍得好靚,或者係啲音響效果好勁,又或者係隻主題曲好聽就會好賣座,我覺得呢啲已經係基本要求。一個觀眾睇完一部戲會推薦叫朋友睇大部份都係講內容。
售貨員嘅態度就真係好難講,有啲只會攞佢自己鍾意嘅嘢畀你睇,有啲驚你唔鍾意就不停畀唔同嘅嘢你睇,有啲要你等好耐,有啲就你呢樣都未睇完,佢轉頭又已經有另一樣。售後服務係冇,純粹心靈滿足,如果有投訴,分分鐘媽你話你唔識嘢,所以下次唔好再幫襯呢個售貨員。