為咗日後有啖好食，唔好損害自己同立法會職員、議員助理肚皮利益，議員迫不得已向現實低頭，大幅度修改標書要求，希望成功招商。據講議員決定免收餐廳營辦商管理費，又減低按金金額，連入標嘅「誠意金」都打折頭，只要負責廚房設施費用同日後水電煤開支就得。
立法會今個月20號會再登報紙廣告招標，6月中截標，若有公司入標，最快7月可以試食，評分後8月開標，一切順利嘅話，10月新大樓入伙時準時開飯。搞到要降格招標，議員今次都算自食其果，不過李華明話好多時政府大樓canteen招標都冇人問津，海關同廉記新總部餐廳招標都一波幾折，有啲canteen更要貼埋水電煤先有人入場，相比之下，立法會條件「辣」好多喇。